Blerim Sallahu, deri më tani zëvendësministër i Drejtësisë, është caktuar si ushtrues i detyrës së ministrit të Drejtësisë, pas zgjedhjes së ministres në detyrë Albulena Haxhiu në postin e nënkryetares së Kuvendit të Kosovës.

Në një komunikatë të Qeverisë në detyrë, kryeministri Albin Kurti e uron Sallahun për përgjegjësinë e re dhe i dëshiron suksese në përmbushjen e detyrave.

Ky emërim vjen në një periudhë kur Kuvendi i Kosovës, i dalë nga zgjedhjet e shkurtit, po përfundon procesin e konstituimit. Më 26 gusht, deputetët zgjodhën Dimal Bashën nga Lëvizja Vetëvendosje në postin e kryekuvendarit, ndërsa Haxhiu dhe tre deputetë të tjerë u emëruan nënkryetarë.

Procesi ende nuk është përfunduar, pasi duhet të zgjidhet nënkryetari nga radhët e komunitetit serb. Për shkak të refuzimit të Listës Serbe për të mbështetur kandidatin Sllavko Simiq, kryeparlamentari i sapozgjedhur hodhi në votim emra të tjerë, përfshirë Nenad Rashiq, por asnjëri nuk mori shumicën e nevojshme të votave.

Përfundimi i konstituimit të Kuvendit do të hapë rrugën për formimin e Qeverisë së re të Kosovës.