Nënkryetari i Partisë Demokratike, Luçiano Boçi, ngriti akuza të forta në seancën e sotme plenare, duke vënë në shënjestër drejtimin e seancës nga kryeparlamentari Niko Peleshi. Boçi denoncoi ndërprerjen e qëllimshme të fjalës së deputetëve të opozitës dhe parregullsi të rënda në procesin e votimit.

Sipas tij, mosregjistrimi i votave të disa deputetëve të PD-së nuk është një gabim teknik, por një manovër e kalkuluar nga mazhoranca, sidomos në ligjet me “ndjeshmëri të lartë publike”.

“Kjo nuk është rastësi, kjo është e qëllimshme. Është një truk që përdoret për të sulmuar PD-në në media,” u shpreh Boçi.

Përjashtimi i Berishës, “vendim arbitrar”

Gjatë fjalës së tij, Boçi u ndal edhe te përjashtimi i ish-kryeministrit Sali Berisha nga seanca, duke e quajtur vendimin të pabazuar dhe në kundërshtim me rregulloren.

Ai theksoi se procesverbali i seancës nuk përmban asnjë deklaratë të Berishës që të justifikonte masën e përjashtimit.

“Nuk pashë asnjë fjalë të zotit Berisha që të tejkalonte fjalorin apo qëndrimin e tij. Vendimi u mor mbi një deklaratë jashtë parlamentit, gjë që bie ndesh me rregulloren,” tha Boçi.

Ai shtoi se deputetët mund të mbahen përgjegjës vetëm për qëndrimet e shprehura në sallë, jo për ato të dhëna jashtë saj.

“Ky është standard i rrezikshëm”

Boçi paralajmëroi se veprimet e mazhorancës po krijojnë një precedent të rrezikshëm për funksionimin demokratik të Kuvendit.

Ai përfundoi duke theksuar se opozita ka qenë e unifikuar në votime, pavarësisht “trukeve” që, sipas tij, po përdoren nga kryesia e Kuvendit.