Mbretëria e Bashkuar dhe Franca kanë rënë dakord të zgjasin për dy muaj marrëveshjen ekzistuese për menaxhimin e emigracionit, vetëm pak orë para skadimit të saj, në mënyrë që të përmbyllin negociatat për një marrëveshje të re.

Marrëveshja fillestare, e arritur në vitin 2018, parashikon financimin nga Londra të operacioneve franceze për forcimin e kufijve dhe ndalimin e migrantëve që tentojnë të kalojnë Kanali Anglez me mjete të vogla lundruese. Në vitin 2023, ajo u zgjat për tre vite, me një fond prej 476 milionë paundësh.

Sipas autoriteteve britanike, gjatë kësaj periudhe janë ndaluar rreth 42 mijë tentativa për kalim të paligjshëm drejt brigjeve britanike. Për zgjatjen e përkohshme dy mujore, Londra do të kontribuojë me 16.2 milionë paund shtesë për të mbështetur operacionet franceze të mbikëqyrjes dhe zbatimit të ligjit.

Rreth 700 oficerë francezë do të vijojnë patrullimin 24 orë në ditë përgjatë vijës bregdetare, në përpjekje për të frenuar fluksin e emigrantëve.

Ministrja e Brendshme britanike, Shabana Mahmood, deklaroi se qeveria do të ndërmarrë çdo hap të nevojshëm për të rikthyer kontrollin në kufij.

Çështja e emigracionit mbetet një ndër temat më të ndjeshme politike në Britani, veçanërisht pas rritjes së ndjeshme të numrit të mbërritjeve në vitin 2025 dhe presionit nga forcat politike opozitare.

Ndërkohë, negociatat për një marrëveshje të re vijojnë, mes debateve për kushtëzimin e fondeve me rezultate konkrete në ndalimin e kalimeve, një ide që është kundërshtuar nga pala franceze për shkak të rrezikut që mund të sjellë për jetën e emigrantëve.