Regjisori dhe skenaristi i njohur Bujar Kapexhiu ka bërë një deklaratë kontroverse në një intervistë të dhënë së fundmi për Top Albania Radio. Kapexhiu ka theksuar se të shkruarit humor kërkon kapacitet të veçantë, të cilin, sipas tij, e kanë kryesisht burrat.

“Humori është privilegj i të mençurve, dhe këtu e kam absolute. Vetëm mund të jetë ndonjë përjashtim i jashtëzakonshëm në botë, femër që shkruan humor nuk ka,” deklaroi ai, duke shtuar se kjo është një fushë ku meshkujt kanë një dominancë të padiskutueshme.

Në vijim të intervistës, Kapexhiu përmendi edhe barcaletat, duke theksuar se shumica e tyre përfshijnë femrat si objekt humori dhe se janë krijuar nga meshkujt. “A e dini që ka shumë barcaleta për femrat, i sajojnë meshkujt, e dini që ka shumë barcaleta për meshkujt, i sajojnë po meshkujt, se femrat nuk kanë kapacitet për ta bërë këtë,” u shpreh ai.

Këto deklarata të Kapexhiut kanë ngjallur reagime të shumta, duke sjellë diskutime mbi rolin e grave në fushën e humorit dhe stereotipet gjinore që ende mbizotërojnë në shoqëri.