Gjykata e Shkallës së Parë në Fier ka dënuar me burgim të përjetshëm Azgan Mërnicën, i shpallur fajtor për vrasjen e efektivit të forcave speciale “Shqiponja”, N.C.

Prokuroria kërkoi dënimin maksimal për 45-vjeçarin, i cili u akuzua për tre vepra penale: “Vrasje me armë zjarri e punonjësit të policisë”, “Armëmbajtje pa leje” dhe “Drejtim të parregullt të mjetit”.

Ngjarja e rëndë ndodhi më 13 maj 2024, rreth orës 13:30, në fshatin Baltëz të Fierit. Sipas dosjes hetimore, gjithçka nisi pas një paralajmërimi të policit ndaj Mërnicës për drejtim të rrezikshëm të automjetit. Debati verbal përfundoi tragjikisht kur Mërnica nxori armën dhe e qëlloi efektivin për vdekje.

Pas ngjarjes, i akuzuari u arrestua pas një operacioni 48-orësh dhe negociatash me familjarët. Me vendimin e sotëm, ai do të vuajë dënimin maksimal në burgim të përjetshëm.