Gazetari Adriatik Doçi ka ofruar detaje të reja lidhur me arrestimin e ish-Presidentit Ilir Meta në një studio televizive. Ai shpjegoi se arrestimi lidhet me dosjet hetimore CEZ/DIA dhe lobimin në Shtetet e Bashkuara, të cilat janë bashkuar në një hetim që implikon Metën.

Doçi thekson se ka pasur disa dëshmi në SPAK që kanë rënduar pozitën e Metës në lidhje me aferën CEZ/DIA. “Janë disa fraksione hetimore, një prej të cilave është CEZ/DIA. Mendohet se ka një dëshmitar kyç, Elvis Mata, drejtues i LRI në 2005, i cili ka dhënë dëshmi para SPAK-it për rolin e Metës në këtë aferë korruptive mes CEZ dhe DIA,” tha Doçi.

Ai sqaroi se DIA, e drejtuar nga Kastriot Ismailaj, u krijua në 2009 dhe filloi një kontratë korruptive për mbledhjen e borxhit të keq të CEZ, një manovër që sipas Doçit, kishte si qëllim përfshirjen e Metës në këtë proces. “CEZ kalon para për mbledhjen e borxhit të keq, ndërsa DIA lëshon fatura fiktive si pretendim për mbledhjen e borxhit,” shpjegoi ai.

Doçi përmendi dëshmitarë të tjerë si ish-përfaqësuesi i CEZ në Shqipëri, Josef Hojcek, i cili ka dëshmuar se Ilir Meta ishte i përfshirë në këtë skemë. Gjithashtu, ai zbuloi mesazhe të Metës drejtuar Ismailajt, në të cilat ai kërkonte 200 mijë euro para zgjedhjeve të vitit 2009, duke theksuar se këto janë fakte publike që lidhen me kërkesat për para nga ana e Metës.

Më tej, Doçi trajtoi çështjen e lobimit në SHBA në vitet 2016-2017, duke theksuar se LSI ka shpenzuar 1.2 milion euro për lobim pa i deklaruar këto para në institucionet ligjzbatuese në Shqipëri. “Mendohet se këto janë para të pista dhe kanë qenë objekt i një hetimi mediatik,” tha ai.

Ai gjithashtu përmendi një dosje të dytë në SPAK lidhur me shërbimet estetike që Meta dhe Kryemadhi kanë kryer gjatë 20 viteve në Vjenë dhe San Marino, me shpenzime që nuk janë deklaruar në ILDKPI. “Këto janë fakte që po hetohen me letërporosi,” përfundoi Doçi.

Këto deklarata sjellin një dritë të re mbi hetimet që po zhvillohen për ish-Presidentin dhe përfshirjen e tij në afera korruptive, duke e bërë situatën politike më të tensionuar në Shqipëri.