Në një bashkëbisedim me gazetarët, kreu i Komisionit Qendror të Zgjedhjeve (KQZ), Ilirjan Celibashi, renditi disa nga problemet që kanë dalë në këtë fazë të përgatitjeve për zgjedhjet parlamentare të 11 majit.

Një nga shqetësimet kryesore të KQZ-së është mungesa e emrave për anëtarët e Komisioneve Zonale të Administrimit Zgjedhor (KZAZ), të cilat ende nuk janë dorëzuar nga partitë politike.

Celibashi i bëri gjithashtu thirrje Kuvendit të Shqipërisë që të miratojë sa më parë buxhetin për partitë politike që marrin pjesë në zgjedhje, duke theksuar se vonesat në alokimin e fondeve mund të ndikojnë në procesin zgjedhor.

“I kemi kërkuar Kuvendit që sa më parë të miratojë buxhetin për partitë politike të cilat do të marrin pjesë në zgjedhje. Me siguri ky buxhet do t’u vihet në dispozicion subjekteve zgjedhore para fushatës.”