Këngëtarja me famë botërore Céline Dion është rikthyer për herë të parë në tapetin e kuq pas diagnostikimit me sindromën ‘Njeriu i ngurtë’. E shoqëruar nga djali i saj 23-vjeçar René-Charles Angélil, ajo u paraqit në një event të mbajtur në Nju Jork për promovimin e dokumentarit “I Am: Celine Dion” të ‘Prime Video’. Dokumentari sjell një pasqyrë të karrierës së saj si një interpretuese legjendare dhe rrëfen betejën e Dion me çrregullimin e rrallë neurologjik, sindromën e personit të ngurtë (SPS).

Në këtë dalje publike, 56-vjeçarja kishte zgjedhur të vishte një fund të gjatë dhe një bluzë me mëngë të gjata në ngjyrë të bardhë, ndërsa djali i saj u shfaq me një kostum të zi elegant. Për fansat dhe publikun, kjo paraqitje ishte një moment emocionues, duke parë këngëtaren e tyre të dashur të rikthehet në një event të tillë pas sfidave shëndetësore që ka përjetuar.