Në Komisionin e Dezinformimit, është ngritur çështja e problematikave të dezinformimit që ndodhin në disa media, veçanërisht në portale. Kreu i Autoritetit Kombëtar të Sigurisë Kibernetike, Igli Tafa, theksoi se mungesa e një kapaciteti ligjor aktual dhe e rregullave më të forta përbën një pengesë për ushtrimin e funksionit të parandalimit dhe ndëshkimit në këtë fushë.

“Arsyeja është shumë e thjeshtë, sepse nuk ka një rregullator të portaleve që të vendosë diktaturë, në thonjëza, për të ruajtur stabilitetin,” shpjegoi ai.

Tafa përshkroi se si autoriteti vepron në raport me mediat dhe dezinformimin. “Për portalet ka një boshllëk në rastet kur ne ndeshemi me dezinformim. E vetmja gjë që bëjmë është nxjerrja e një deklarate zyrtare dhe dalja në media për të sqaruar situatën dhe për të informuar publikun. Nuk ka një mekanizëm që të penalizojë apo të parandalojë këtë gjë, pasi portalet janë plotësisht të pavarura dhe japin atë që duan të japin,” tha ai.

Ai gjithashtu theksoi se për këtë pjesë “nuk ka një mekanizëm, sepse nuk ka një rregullator për portalet që t’i filtronte të gjitha këto informacione.” Këto komente kanë nxjerrë në pah nevojën për një rregullim më të mirë të medias dhe mekanizmave që do të ndihmonin në reduktimin e dezinformimit dhe mbrojtjen e stabilitetit të informacionit në vend.