Gjykata e Apelit ka lënë në fuqi masën e arrestit në burg për Erdys Arrazin, i akuzuar për shtytjen e bashkëshortes së tij, Alma Arrazi, drejt vetëvrasjes. Tridhjetenjëvjeçari do të qëndrojë në qeli, pasi Alma Arrazi vetëmbyt në lumin Bunë të Shkodrës së bashku me tre fëmijët e saj të mitur.

Gjatë seancës, Erdys Arrazi shpërtheu në lot duke deklaruar pafajësinë e tij dhe duke shprehur dhimbjen për humbjen e fëmijëve të tij. “Ju lutem shikoni gjendjen time! S’kam vajtur hala te varri i fëmijëve. Çfarë kam bërë që më mbani në burg, të paktën të di çfarë kam bërë,” u shpreh ai.

Arrazi u transportua herët në mëngjes nga burgu i Reçit dhe ishte i pranishëm në seancë së bashku me avokatin e tij. Të pranishëm ishin edhe familjarë të tij. Akuza ndaj Arrazit është për veprën penale “Shkaktim i vetëvrasjes”, duke u bazuar në dyshimet se 39-vjeçarja Alma Arrazi mori aktin ekstrem për shkak të dhunës së vazhdueshme psikologjike dhe tradhtisë nga bashkëshorti.

Ngjarja tragjike ndodhi më 2 maj 2023, kur Alma Arrazi mori tre fëmijët përdore – Arditin 3 vjeç, Gresin 7 vjeçe dhe Ergesën 9 vjeçe – dhe u vetëmbyt në lumin Buna. Trupat e fëmijëve dhe nënës u gjetën gjatë një periudhe tre-ditore kërkimesh nga polumbarët, pas zbulimit të trupit të vajzës së parë nga një peshkatar.

Alma Arrazi u varros në Durrës pranë nënës së saj, ndërsa fëmijët e saj prehen në Shkodër. Kjo ngjarje ka shkaktuar një tronditje të madhe në komunitet dhe ka ngritur pyetje mbi shkaqet që çuan në këtë tragjedi të paprecedent.