Kryeministri Edi Rama ka braktisur zyrën e tij në Kryeministri për t’iu bashkuar darkës me komisioneren e zgjerimit të BE-së, Marta Kos, ndërsa pak minuta më vonë nga godina e qeverisë është larguar edhe zv.kryeministrja Belinda Balluku. Burime për BW bëjnë të ditur se Balluku nuk është larguar me automjetin e saj, por me një makinë tjetër.

Zv.kryeministrja është parë të hyjë në ambientet e Kryeministrisë rreth orës 12:25, duke qëndruar aty deri në mbrëmje, për rreth tetë orë. Sipas burimeve, takimi mes kryeministrit dhe Ballukut është shoqëruar me debate të ashpra dhe tone të larta. Vendimi i GJKKO-së, i cili e pezullon Ballukun nga detyra, e bën të pamundur ushtrimin e funksioneve të saj ekzekutive. Mësohet se gjatë takimit, Rama i ka kërkuar dorëheqjen.

Ndërkohë, SPAK njoftoi zyrtarisht se ka ngritur një akuzë të re ndaj Belinda Ballukut, kësaj radhe për tenderin e Unazës së Madhe të Tiranës, loti 4. Ashtu si në rastin e tunelit të Llogarasë, Balluku dyshohet për favorizim të operatorëve pjesëmarrës në tender. Hetimet e reja kanë shtuar më tej presionin mbi zv.kryeministren e pezulluar, që vijon të mbetet në qendër të zhvillimeve politike të ditës.