Në orët e para të mëngjesit të sotëm, restoranti i Andis Dajës në Velipojë u sulmua për herë të dytë me tritol. Pronari i restorantit, i cili ka investuar me kursimet e tij të fituara gjatë 10 viteve punë në Gjermani, ka deklaruar për mediat se nuk ka konflikte me askënd dhe nuk i ka borxh asnjë personi.

“Mbrëmë nga ora 3:00 e natës më ka marrë vëllai në telefon. Është hera e dytë që ndodh. Ka ardhur nga mbrapa dhe ka hedhur lëndë shpërthyese, për fat të mirë vëllai ka qëlluar pak metra më tutje dhe nuk ka pasur dëme fizike,” tregoi Andis Daja.

Ai shprehu zhgënjimin dhe frustrimin e tij ndaj sulmit, duke theksuar se investimi në restorant ishte bërë me mundin e tij personal dhe se nuk kishte asnjë arsye për të qenë shënjestër e një akti të tillë.

“Unë jam emigrant në Gjermani që 10 vite. E pash të arsyeshme të bëja një investim në vendin tim, dhe shikoje çfarë ndodh. Të vijnë të sulmojnë pa i pasur kujt borxh, as asgjë, nuk e di, shumë i zhgënjyer. Shpresoj që policia të merret seriozisht se është hera e dytë, të gjenden autorët sa më shpejtp,” tha ai.

Policia po heton rastin dhe është në kërkim të autorëve të këtij akti kriminal.