VOJVODINË – Edhe pas 17 vitesh nga shpallja e pavarësisë së Kosovës, ende ka shqiptarë që nuk e njohin shtetin e tyre të origjinës dhe vazhdojnë t’i përmbahen një retorike pro-serbe. Një rast i tillë është ai i Demo Berishës, një shqiptar me origjinë nga Peja, i cili jeton aktualisht në Vojvodinë dhe ka dhënë deklarata të hapura kundër pavarësisë së Kosovës.

Në një intervistë për RTV Panonia dhe Kanal 9, Berisha ka deklaruar se “atdheu i tij është Serbia”, duke refuzuar të njohë Republikën e Kosovës si shtet të pavarur dhe sovran. Ai pretendon se ka lindur në Pejë, ku ka kryer shkollën fillore, më pas ka vazhduar në Sarajevë, ku ka ndjekur arsimin ushtarak, e më pas në Novi Sad.

Demo Berisha është një ish-pjesëtar i Ushtrisë Jugosllave dhe më vonë ka shërbyer për një kohë të gjatë në Policinë Ushtarake të Serbisë, ku sipas deklarimeve të tij, ka përfunduar karrierën.

Ajo që ka ngjallur reagime të forta është fakti se Berisha nuk e fsheh përfshirjen e tij në strukturat ushtarake të një shteti që për dekada ka ushtruar dhunë dhe represion mbi popullin shqiptar të Kosovës. Madje, emri i tij i modifikuar – nga “Demë” në “Demo” – është parë nga disa si tentativë për t’u shkëputur nga identiteti i tij shqiptar, në përputhje me qëndrimet politike që mbron.

Deklaratat e tij janë dënuar ashpër nga qytetarë dhe aktivistë të ndryshëm në rrjetet sociale, të cilët e konsiderojnë Demo Berishën si simbol të asimilimit dhe mohimit të së vërtetës historike për Kosovën.

Kosova u shpall shtet i pavarur më 17 shkurt 2008 dhe është njohur deri më tani nga mbi 100 shtete në botë, përfshirë SHBA-në dhe shumicën e vendeve të BE-së. Megjithatë, tensionet politike dhe ndikimi i Serbisë në komunitetet shqiptare të mbetura në territorin e saj apo në rajone të tjera të ish-Jugosllavisë, vijojnë të prodhojnë raste të tilla përçarëse.

Përballë këtyre deklaratave, analistët theksojnë nevojën për më shumë vetëdijësim kombëtar dhe mbështetje për diasporën shqiptare, që të mos bien pre e propagandës dhe keqinformimit.