Delegacioni i Bashkimit Europian në Shqipëri ka reaguar pas vendimit të administratës së Presidentit Donald Trump për të pezulluar përkohësisht ndihmën e huaj amerikane për 90 ditë.

Në deklaratën e tij, BE thekson angazhimin e palëkundur për reformën në drejtësi në Shqipëri, duke kujtuar se ka qenë në krye të mbështetjes për këtë proces që nga viti 2016. Bashkimi Europian ka dhënë mbi 50 milionë euro asistencë teknike dhe mbështetje buxhetore për të ndihmuar ndërtimin e institucioneve të reja të drejtësisë.

Sipas Delegacionit të BE-së, reforma në drejtësi ka dhënë rezultate të prekshme, ndërsa mbështetja europiane për këtë proces do të vijojë përmes fondeve të tjera, përfshirë Mekanizmin e Rritjes dhe Reformës për Ballkanin Perëndimor.

Një pjesë e rëndësishme e deklaratës i kushtohet SPAK-ut, për të cilin BE thekson se ka një rol kyç në luftën kundër korrupsionit dhe krimit të organizuar. “BE-ja e ka mbështetur SPAK-un që nga themelimi i tij përmes projekteve EU4LEA dhe EU4FOCAL, me një buxhet të përgjithshëm mbi 8 milionë euro”, thuhet në deklaratë.

Në përfundim, BE vlerëson se SPAK ka dhënë rezultate konkrete, duke ndihmuar Shqipërinë në krijimin e një historiku të besueshëm në luftën kundër krimit të organizuar dhe korrupsionit, përfshirë rastet në nivele të larta.