Pas përfundimit të seancës plenare në Kuvendin e Shqipërisë, deputeti i Partisë Demokratike (PD), Ervin Salianji, ka shprehur kritika ndaj miratimit të Buxhetit 2024.

Salianji akuzoi socialistët se e kanë kaluar buxhetin në mënyrë tinëzare, duke prekur shtresën e mesme dhe qytetarët e thjeshtë. Ai theksoi se kjo veprimtari “e ka djegur Kushtetutën e Shqipërisë” dhe se qeveria po vepron si një juntë. Salianji gjithashtu theksoi se, për herë të parë, profesionet e lira do të taksohen me 23%, duke përfshirë gazetarët, stomatologët, dhe të tjera.

“E ka djegur Kushtetutën e Shqipërisë dhe po veprojnë si një juntë. Forca fizike e krimit në zgjedhje bëjnë të mundur mbajtjen e kësaj ngrehine. E patë sot se si në mënyrë tinëzare dhe me vrap e votoi buxhetin, duke goditur shtresën e mesme dhe qytetarët e thjeshtë. Për herë të parë do të taksohen me 23 % profesionet e lira, ju gazetarët dhe stomatologët, etj”, tha ai.

Buxheti i shtetit u miratua me 74 vota pro dhe 4 vota kundër, duke shënuar një kohe rekord për miratimin. Në seancë, ndodhën tensione dhe konflikte mes deputetëve, por kryetarja e Parlamentit, Lindita Nikolla, e ka shpejtuar procesin duke hedhur poshtë të gjitha amendamentet e opozitës.