Shefi i Shtëpisë së Bardhë firmosi një dekret ku përcaktohet një objektiv që automjetet me emetim zero të përbëjnë 50 për qind të të gjithë mjeteve të shitura në SHBA deri në 2030-ën.

“Kjo është e rëndësishme, por ne duhet të vazhdojmë të investojmë në njerëzit tanë dhe kapacitetin prodhues për të zhbllokuar gjithë potencialin”, tha presidenti amerikan Biden.

Menjëherë pas nënshkrimit të dekretit, Biden bëri një shëtitje me automjetin elektrik Jeep Wrangler në Shtëpinë e Bardhë.

Në fjalën e tij Biden vuri në dukje se SHBA-të janë në konkurrencë me Kinën dhe vendet e tjera. Biden tha se Kina po udhëheq garën si një nga tregjet me rritje të shpejtë sa i takon automjeteve elektrike.

Po ashtu presidenti amerikan tha se pjesa më e rëndësishme e automjeteve elektrike janë bateritë, dhe se 80 për qind e kapacitetit të prodhimit të baterive gjendet në Kinë.

“Nuk ka asnjë arsye që ne të mos marrim përsëri kryesimin dhe të jemi përsëri liderë”, tha Biden, duke shtuar se automjetet elektrike dhe bateritë duhet të prodhohen edhe në SHBA.