Vrasja e Ilaria Sula, 22-vjeçares shqiptare në Itali, ka tronditur jo vetëm familjen e saj, por edhe komunitetin më gjerë.

Në një rrëfim prekës, gjyshi i Ilarias ka treguar për herën e fundit që komunikoi me mbesën e tij. Ai tha se telefoni i saj është tashmë në duart e policisë dhe se ai nuk ka pasur kontakt as me prindërit e Ilarias gjatë kësaj kohe tragjike.

“Gjendja e familjarëve nuk është e mirë. Telefoni i Ilarias tani e ka policia. Unë kam një javë që nuk kam komunikuar as me djalin dhe as me nusen.”

Gjyshi kujtoi momentet e fundit të lumtura me Ilarian, duke theksuar se ata u takuan për Vitin e Ri, ndërsa për herë të fundit e festuan së bashku ditëlindjen e tij në korrik.

“Ajo ishte kënaqësia ime. Isha i lumtur që ishim të gjithë bashkë.”

Ai gjithashtu theksoi se Ilaria ishte një studente e mirë, e rrethuar nga shoqëri e mirë, por nuk e kishte ndarë me familjen faktin që kishte një të dashur.

“Me ne nuk ishte hapur të na tregonte që kishte një të dashur.”

Ngjarja ka shkaktuar tronditje të madhe, ndërsa hetimet po vijojnë për të zbardhur plotësisht motivet dhe rrethanat e krimit makabër.