Tentativa e Bashkimit Europian për të organizuar një takim të përbashkët mes kryeministrit të Kosovës, Albin Kurti, dhe presidentit të Serbisë, Aleksandar Vuçiç, ka dështuar. Pas përfundimit të raundit të parë të takimeve dypalëshe, ishte paralajmëruar mbajtja e një takimi të përbashkët mes dy liderëve, por një takim i tillë nuk u zhvillua.

Përfaqësuesi i lartë për politikë të jashtme dhe siguri të Bashkimit Evropian, Josep Borrell, dhe i dërguari i BE-së për dialog, Miroslav Lajçak, zhvilluan takime të ndara me Kurtin dhe Vuçiçin. Në pamundësi për t’i ulur në një tavolinë të përbashkët bisedimesh, Lajçak dhe Borrell nisën raundin e dytë të takimeve bilaterale me secilin lider.

Presidenti i Serbisë, Aleksandar Vuçiç, deklaroi për mediat në Bruksel se nuk u takua me kryeministrin e Kosovës, Albin Kurti, pavarësisht se një takim i tillë ishte paralajmëruar nga Bashkimi Evropian.

“Nuk ka pasur takim me Kurtin sepse Kurti nuk ka dashur apo nuk ka guxuar, pyeteni atë të më takojë dhe të bisedojmë. Besoj se do të mësoni më shumë për këtë nga evropianët,” tha Vuçiç.

Ai shtoi se është kthyer tri herë në takimet me Borrell dhe Lajçak, të cilët ia kanë përcjellë mesazhet e Kurtit, të cilave ai i është përgjigjur. Vuçiç e vlerësoi korrektësinë e takimeve me ndërmjetësit evropianë dhe i konsideroi “të suksesshme” takimet në Bruksel, duke thënë se gjatë tyre është diskutuar për gjithçka që lidhet me Kosovën dhe zbatimin e marrëveshjeve. Ai njoftoi se kryenegociatorët e Kosovës dhe Serbisë do të vazhdojnë bisedimet javën e ardhshme.