Kryeministri në detyrë i Kosovës, Albin Kurti, nuk arriti të sigurojë sot votat e nevojshme për krijimin e qeverisë së re “Kurti 3”.

Gjatë seancës në Kuvend, propozimi për kabinetin mori vetëm 56 vota pro, ndërsa 52 deputetë votuan kundër dhe 4 abstenuan, duke bërë të pamundur formimin e qeverisë së re.

Sipas Kushtetutës së Kosovës, procesi për formimin e qeverisë kalon tani tek presidentja Vjosa Osmani. Kabineti i saj njoftoi se presidentja do të ftojë partitë politike për konsultime brenda afatit kushtetues.

“Presidentja Osmani do t’i ftojë partitë politike për konsultime gjithsesi brenda afatit kushtues dhe në përputhje me përgjegjësitë kushtetuese,” deklaroi për RTK-në këshilltari i saj për media, Bekim Kupina.

Procesi i ri pritet të vendosë se cila parti ose koalicion do të ketë mundësinë për të propozuar një qeveri të re dhe të shmangë një krizë të gjatë politike.