Një detaj i ri ka dalë në dritë lidhur me vrasjen e 44-vjeçarit shqiptar Francesk Shkambi në Michigan të SHBA-së, i cili u ekzekutua mbrëmjen e së dielës në verandën e restorantit ku punonte. Rezulton se viktima ishte i afërm i Elvis Shkambit, 30-vjeçarit që vrau gjyqtarin Astrit Kalaja në sallën e gjyqit në Tiranë më 6 tetor.

Pak javë më parë, Francesk Shkambi kishte hapur një fushatë GoFundMe për të mbledhur fonde në ndihmë të Elvis dhe Gjon Shkambit, duke u prezantuar si familjar i tyre. Fushata kishte arritur të grumbullonte mbi 8 mijë dollarë, të destinuara sipas tij për “mbrojtje ligjore profesionale dhe të pavarur”.

Si ndodhi vrasja

Sipas mediave amerikane, ngjarja u regjistrua rreth orës 21:30, në verandën e restorantit Prime 7 në Commerce Township, ku Francesk Shkambi ishte menaxher dhe bashkëpronar. Ai u gjet i plagosur rëndë dhe humbi jetën në spital, pavarësisht ndihmës mjekësore të menjëhershme.

Rreth 20 minuta më pas, një 65-vjeçar nga Farmington Hills u paraqit vetë në polici dhe u arrestua pa rezistencë. Autoritetet sekuestruan një pistoletë 9 mm, e dyshuar si arma e krimit dhe e raportuar më herët si e vjedhur.

Hetuesit thonë se viktima dhe autori e njihnin njëri-tjetrin dhe mes tyre kishte një konflikt të vazhdueshëm, por motivi i plotë nuk është bërë ende publik.

Reagimet dhe tronditja në komunitet

Familjarët dhe stafi i restorantit e përshkruan Francesk Shkambin si një njeri të qetë, punëtor dhe të dashur. Lajmi i vrasjes së tij ka shkaktuar tronditje të thellë në komunitetin shqiptar dhe amerikan në zonë.

Restoranti Prime 7 njoftoi mbylljen e aktivitetit përkohësisht “për të nderuar kujtimin e Franceskut”.

Hetimet për ngjarjen vijojnë, ndërsa pritet që autoritetet amerikane të zbulojnë motivin dhe rrethanat e plota të konfliktit që çoi në vrasjen e 44-vjeçarit.