Policia e Tiranës ka zbuluar detaje të reja nga operacioni i koduar “Tracking”, i zhvilluar në Nikël, ku në një banesë në pronësi të Ylli Zallës u gjet një arsenal i madh armësh dhe lëndësh plasëse. Zbulimi vjen në kuadër të hetimeve për atentatin e 12 nëntorit, pranë rrethrrotullimit të aeroportit të Rinasit, ku mbeti i vrarë Gilmando Dani dhe u plagos agjenti i AMP-së, Muçi Shalja.

Gjatë kontrolleve në banesën e Zallës, efektivët e Krimeve të Rënda dhe Komisariatit të Krujës sekuestruan sasi të konsiderueshme armatimi dhe municioni, përfshirë:

• 3 kallëpë tritol
• 12 granata dore sulmuese
• Lëndë plasëse të montuara me kapsolla detonatore, fitil zjarrpërcjellës dhe celularë (mina artizanale)
• 3 ndezës granatash, kapsolla detonatore dhe 5 celularë
• 4 armë zjarri (2 automatikë dhe 2 pushkë), 8 krehra dhe pjesë armësh
• 6000 fishekë të kalibrave të ndryshëm
• 2.25 kg kanabis

Pas zbulimit të arsenalit, policia shpalli në kërkim 48-vjeçarin Ylli Zalla, ndërsa po vijojnë kërkimet për kapjen e tij. Hetimet janë intensifikuar për të zbuluar nëse armët e gjetura kanë lidhje të drejtpërdrejtë me atentatin mafioz në Rinas.

Burime policore bëjnë me dije se kontrolli në Nikël është pjesë e operacionit të gjerë të ndërmarrë prej ditësh në zonën e Fushë-Krujës, ku dyshohet se veprojnë grupe kriminale përgjegjëse për ngjarjen e 12 nëntorit.

Materialet procedurale janë referuar Prokurorisë së Tiranës, ndërsa operacioni “Tracking” vijon në terren.