Prokuroria e Prishtinës ka dhënë detaje nga arrestimi i bashkëshortit të Liridona Murseli, i cili dyshohet se porositi vrasjen e saj për 30 mijë euro.
Organi hetues informon se Naim Murseli, këshilltari i Behgjet Pacollit, dhe autori i dyshuar i krimit, Granit Plava janë arrestuar.
Vendosja e tyre në pranga u bë pas bastjes së dy lokacioneve në Gjakovë, ku mendohet edhe se janë takuar Naim Murseli dhe Granit Plava.
Gjithashtu raportohet se është sekuestruar edhe arma me të cilën u krye vrasja e 33-vjeçares.
Sipas Granit Plavës, bashkëfshatari i tij, Naim Murseli i ka premtuar 30 mijë euro për ekzekutimin e saj.
Një pjesë të parave ia ka dorëzuar ndërsa pjesën tjetër kishin rënë dakord ta merrte më vonë.
Njoftimi i Prokurorisë:
Prokuroria Themelore në Prishtinë, njofton opinionin publik se në koordinim me Policinë e Kosovës, në vazhdën e veprimeve hetimore të ndërmarra në mënyrë intensive, lidhur me rastin e dt. 29.11.2023, i cili është vlerësuar fillimisht si “grabitje me pasoja të vrasjes”, ku ka mbetur e vdekur një grua, ka rezultuar me arrestimin e dy të dyshuarve të përfshirë në këtë rast.
Sipas urdhëresës së Prokurorit të Shtetit dhe me aprovim të gjyqtarit të procedurës paraprake, Njësiti i Hetimeve të Përgjithshme të Prishtinës, në kuadër të Policisë së Kosovës, kanë realizuar bastisje në dy lokacione në Gjakovë, me ç’rast nga ky aksion janë arrestuar personat G.P. (dorasi) dhe N.M. (bashkëshorti i viktimës), të dyshuar në vrasjen e viktimës, si dhe është sekuestruar arma e cila dyshohet të jetë përdorur në këtë rast.
Aktualisht, të dyshuarit janë duke u intervistuar në stacionin policor, derisa ndaj të njëjtëve prokuroria do t’i ndërmerr veprimet e mëtejme ligjore. Prokuroria në koordinim me policinë po vazhdon me ndërmarrjen e veprimeve hetimore lidhur me këtë rast.
