Detaje të reja janë zbardhur nga dosja hetimore për ngjarjen tragjike ku 42-vjeçari Eglantin Proga u dhunua për vdekje nga Denis Meçe. Sipas dokumenteve të hetimit, dëshmitarët kanë ofruar një përshkrim më të detajuar të asaj që ndodhi në vendin e ngjarjes.

Ngjarja ka ndodhur si më poshtë:

Në kohën e incidentit, Eglantin Proga dhe Denis Meçe ndodheshin në të njëjtin lokal. Eglanti ishte ulur në një tavolinë brenda lokalit, ndërsa Denis ishte në një tavolinë në pjesën e jashtme. Pas disa kërkesave nga ana e Denis Meçes për të marrë një cigare nga Eglanti, ky i fundit ia ka dhënë cigaren dhe i ka thënë “Hajde merre”.

Pasi ka marrë cigaren, Denis është futur brenda dhe ka filluar një bisedë me Eglantin, duke i thënë “o kushëri, o kushëri”. Gjatë këtij momenti, situata është tensionuar kur Eglanti i është drejtuar Denisit me fjalë ofenduese, duke i thënë: “O b** q***ë, mos më bëni si të fortë se ju ** k**vat”.

Pavarësisht tensionit, ata janë qeshur dhe kanë vazhduar të komunikojnë. Por më pas, Denis Meçe i ka thënë Eglantit: “Hajde dalim pak jashtë”. Të dy janë drejtuar jashtë për të vazhduar diskutimin në trotuar. Pas një debati të shkurtër, Denis ka goditur Eglantin me grusht. Eglanti është rrëzuar dhe ka goditur kokën në një makinë të parkuar, për të rënë më pas në tokë dhe përplasur në asfalt.

Pavarësisht përpjekjeve të kalimtarëve për të ndihmuar, Eglanti nuk ka reaguar. Disa minuta më vonë ka mbërritur ambulanca, e cila e ka transportuar në spital, ku është konfirmuar vdekja e tij.

Hetimet janë në vazhdim dhe Denis Meçe është ndaluar dhe po përballet me akuzën për vrasje.