Rruga e Arbrit është përfshirë sërish nga një aksident i rëndë rrugor. Ngjarja ka ndodhur pasditen e së dielës pranë zonës së Klosit, ku një automjet tip “Volkswagen” është përplasur me një automjet tip “Audi”, duke shkaktuar pesë të plagosur.

Sipas burimeve zyrtare, të lënduarit janë anëtarë të së njëjtës familje, konkretisht:
• Ismail Kurti, 50 vjeç
• Luiza Kurti, 49 vjeç
• Dile Kurti, 53 vjeç
• Adelina Kurti, 22 vjeç
• Devis Kurti, 28 vjeç

Fillimisht, të plagosurit janë dërguar në qendrën shëndetësore të Klosit për ndihmën e parë, ndërsa më pas janë transportuar drejt spitalit të Burrelit. Për shkak të gjendjes së rënduar shëndetësore, mjekët kanë vendosur t’i transferojnë në Spitalin e Traumës në Tiranë, për trajtim më të specializuar.

Në vendngjarje kanë mbërritur menjëherë forcat e policisë dhe grupi hetimor, të cilët po punojnë për zbardhjen e shkaqeve dhe rrethanave të përplasjes. Paraprakisht, dyshohet se shpejtësia dhe lagështia në rrugë mund të kenë ndikuar në humbjen e kontrollit të njërës prej makinave.