Zyrtari i Drejtorisë së Përgjithshme të Kadastrës dhe kryeplaku i Saukut u arrestuan mbrëmjen e 26 prillit pasi akuzohen për korrupsion me votën gjatë zgjedhjeve vendore të vitit 2019. Arrestimi i Dritan Stokës dhe Agim Osmanit në Tiranë u krye me kërkesë të SPAK dhe firmosur nga Gjykata e Krimeve të Rënda dhe Korrupsionit.

Ata akuzohen se në bashkëpunim me njëri-tjetrin, kanë kryer veprime aktive gjatë fushatës elektorale të zgjedhjeve vendore të vitit 2019, duke kërkuar nga persona të ndryshëm përgatitjen e listave të personave që do të merrnin pjesë në zgjedhje. Ata akuzohen gjithashtu për detyrimin e votuesve për të votuar ose përcaktuar mënyrën e votimit në këmbim të përfitimeve të parregullta, për qëndrim në punë ose për nxjerrjen e lejeve të legalizimit për ndërtime informale të votuesve në zonën e Saukut në Tiranë,” njoftoi sot SPAK.

Përgjimet e bisedave kanë qenë burimi kryesor i provave që nxorrën në dritë veprimet e Dritan Stokës, zyrtarit të Kadastrës, dhe Agim Osmanit, kryeplakut të Lagjes së Re në Sauk. Nëpërmjet këtyre veprimeve, ata dyshohet të kenë ndikuar në pajisjen me leje legalizimi të ndërtimeve pa leje të shtetasve, siç rezulton nga përgjimet e bisedave telefonike të administruara në fashikullin e procedimit penal.

Shtetasit e mësipërm “dyshohen se kanë kryer në bashkëpunim veprat penale ‘Ushtrimi i ndikimit të paligjshëm ndaj personave që ushtrojnë funksione publike’ dhe ‘Korrupsioni aktiv në zgjedhje’,” njoftoi sot policia.