Dhoma Kombëtare e Përmbaruesve Gjyqësorë Privatë ka reaguar ndaj masave të sigurisë të dhëna sot nga Prokuroria e Tiranës për 9 përmbarues gjyqësorë dhe administratorë të kompanive të mikrokredive. Në një deklaratë publike pas arrestimeve të kërkuara nga Prokuroria, Dhoma Kombëtare e Përmbaruesve Gjyqësorë Privatë theksoi se katër vite më parë, ishin ata që kërkuan nga Ministria e Drejtësisë që të njoftohej Banka e Shqipërisë për aktivitetin e “Micro Credit Albania”.

“Skema e mashtrimit ka ende shumë protagonistë të tjerë, të cilët janë aktivë sot, të paprekur dhe të mirëorganizuar. Ata po vazhdojnë të krijojnë pasoja publike duke e çuar skemën e nisur në vitin 2015, në nivele fundore kriminale. Banka e Shqipërisë ka patur dijeni të plotë të zhvillimit të kësaj skeme, mes pesë shoqërive të lidhura me njëra-tjetrën, por nuk ka vepruar, duke e mbajtur këtë aktivitet kriminal brenda perimetrit të ‘mbikëqyrjes’ së saj,” thuhet ndër të tjera në reagimin e tyre zyrtar.

Dhoma Kombëtare kërkoi falje ndaj personave të dëmtuar.