Policia e Tiranës ka reaguar zyrtarisht në lidhje me incidentin e rëndë të ndodhur mbrëmjen e së dielës në kompleksin “Delijorgji”, ku është dhunuar rëndë Laert Kasaj, pronar i restorantit “Tokyo”, me origjinë nga Përmeti.

Sipas njoftimit të uniformave blu, janë shpallur në kërkim dy persona të dyshuar për përfshirje në ngjarje: Ferhat Kaja, 31 vjeç, pronar i lokalit “Stockholm” (i ndodhur përballë kompleksit ku ndodhi konflikti), dhe O. K., 30 vjeç.

Ngjarja ka ndodhur rreth orës 22:30 më 21 korrik, dhe sipas dëshmive të para, konflikti ka degjeneruar në përleshje fizike, ku agresorët kanë përdorur grushte dhe mjete të forta ndaj Kasajt dhe një personi tjetër të pranishëm, E. K.

Dëshmitarë okularë thonë se sulmi ka qenë i qëllimshëm dhe një prej agresorëve është dëgjuar duke e akuzuar viktimën: “Pse më ke denoncuar?”, duke lënë të kuptohet se sherri mund të jetë nxitur nga një kallëzim për zaptim të hapësirës publike.

Policia vijon punën për kapjen e autorëve dhe zbardhjen e plotë të ngjarjes, ndërsa dy të plagosurit ndodhen jashtë rrezikut për jetën.