Një incident i rëndë ka ndodhur në një spital në Itali, ku familjarët e një 23-vjeçareje që ndërroi jetë kanë sulmuar mjekët pasi e afërmja e tyre nuk arriti të mbijetojë pas një operacioni kirurgjikal.

Sipas raportimeve të mediave italiane, rreth 50 persona, përfshirë familjarë dhe miq të të ndjerës, kanë nisur të dhunojnë mjekët. Ata kanë përdorur grushte dhe shqelma, duke i detyruar mjekët të kërkojnë ndihmë dhe të izolojnë veten në një dhomë. Pamjet e incidentit, që janë bërë virale në rrjetet sociale, tregojnë dhunën që është ushtruar ndaj stafit mjekësor.

Një kirurg është goditur disa herë në fytyrë, duke pësuar plagë dhe mavijosje, ndërsa një mjek tjetër ka thyer dorën gjatë përleshjeve.

E reja kishte qenë nën mbikëqyrjen intensive të mjekëve që nga muaji qershor, pas një aksidenti automobilistik. Incidenti ka ngritur shqetësime të mëdha mbi sigurinë e stafit mjekësor dhe dhunën që shpesh ndodhet në institucione shëndetësore.