Ana Sino, nëna e Melisa Trëndafilit, e cila ndodhet në spital pasi bashkëshorti i saj tentoi ta digjte të gjallë, ka reaguar për herë të parë publikisht. E shqetësuar për sigurinë e saj dhe të familjes, ajo shprehu frikën për një përsëritje të ngjarjes, pasi dhëndri i saj është ende në kërkim nga policia.

“Normalisht që kam frikë. Kam marrë me vete fëmijët, sepse për sa kohë ai bëri këtë, mund të bëjë edhe të tjera. Jam këtu prej pesë ditësh dhe nuk shoh asnjë polic që të më mbrojë. Kujdesi i spitalit është i jashtëzakonshëm, dhe falenderoj ministrinë e shëndetësisë për kujdesin special ndaj vajzës sime. Por nga ana e policisë, nuk ka asnjë mbrojtje,” tha Ana Sino në një prononcim për mediat.

Ajo gjithashtu shprehu zhgënjimin ndaj autoriteteve dhe bëri një thirrje për kapjen e shpejtë të dhëndrit të saj, duke shtuar se jeton me frikë për jetën e saj dhe të familjes. “Unë nuk kam ndonjë kujdes nga shteti. I kërkoj shtetit që ai të kapet dhe të marrë dënimin e merituar, sepse ne jetojmë me frikë,” theksoi ajo.

Ana Sino, me zemër të thyer dhe e revoltuar, shtoi se nëse policia nuk e gjen dhëndrin e saj, ajo vetë do të merrte masa ekstreme. “Më kanë pyetur disa herë, por unë po ta dija ku është, do ta vrisja vetë. Prandaj arrijmë në vetëgjyqësi. Unë, po ta gjej, do t’i bëj të njëjtën gjë që i bëri vajzës sime,” tha ajo e revoltuar.

Ky rast tronditës ka ngritur shqetësime për sigurinë e viktimave të dhunës dhe mbrojtjen që ofrohet nga autoritetet, ndërsa Melisa Trëndafili vazhdon të marrë trajtim të veçantë në spital.