Ish-presidenti amerikan Donald Trump ka dalë sërish me kritika për presidentin ukrainas, Volodymyr Zelenskyy, lidhur me pushtimin e Ukrainës nga Rusia. Trump e ka akuzuar Zelenskyy se është “një nga shitësit më të mëdhenj” që ka parë ndonjëherë dhe se sa herë që ai viziton Shtetet e Bashkuara, Ukraina merr 100 miliardë dollarë ndihma.

“Mendoj se Zelensky është një nga shitësit më të mëdhenj që kam parë ndonjëherë. Sa herë që ai vjen, ne i japim 100 miliardë dollarë. Kush tjetër ka marrë aq shumë para në histori? Nuk ka pasur kurrë. Dhe kjo nuk do të thotë që nuk dua ta ndihmoj, sepse ndjehem shumë keq për ata njerëz. Por, ai nuk duhej kurrë ta kishte lejuar të fillonte ajo luftë. Ajo luftë është një humbje,” deklaroi Trump.

Trump, i cili ka një histori të gjatë të lavdërimeve për liderin rus Vladimir Putin, ka shprehur gjithashtu mbështetje për Putinin në lidhje me ndërhyrjen e Rusisë në zgjedhjet presidenciale të vitit 2016. Së fundmi, Zelenskyy dhe Trump janë takuar muajin e kaluar për të diskutuar mundësitë për përfundimin e luftës në Ukrainë.