Në një dekadë të fundit, Donald Trump ka transformuar Partinë Republikane dhe ka lënë gjurmë të thella në skenën politike të Amerikës, e cila sot është më e ndarë se kurrë. Nëse fiton zgjedhjet e ardhshme, ai do të bëhet presidenti i parë në historinë e SHBA-ve që është shpallur fajtor për një krim.

Pas humbjes në zgjedhjet e vitit 2020, shumë menduan se epoka e Trump-it kishte përfunduar. Megjithatë, Trump nuk ishte i gatshëm ta pranonte humbjen. “Nëse numëroni votat e ligjshme, unë fitoj lehtësisht,” tha ai, duke ngritur dyshime për integritetin e procesit. Ai u bëri thirrje mbështetësve të tij të ndërprisnin certifikimin e rezultateve në Kongres më 6 janar 2021, çka çoi në trazira dhe në shkarkimin e tij për herë të dytë.

Gazetarët Russ Buettner dhe Susanne Craig, në librin e tyre “Lucky Loser,” zbulojnë detaje mbi ambiciet dhe fuqinë e Trump-it. Ata përshkruajnë një njeri që ndjek intuitën dhe ka pak besim tek ekspertët. Nga viti 1980, ndërtesat e tij me emrin e madh “Trump” përfaqësonin ambicien dhe shpirtin e tij të biznesit, pavarësisht nga falimentimet dhe vështirësitë që kaloi gjatë karrierës.

Kur Trump shpalli kandidaturën e tij për president në vitin 2015, ai përdori një retorikë nacionaliste dhe polarizuese. Fitorja e tij në vitin 2016 dhe emërimi i tre anëtarëve konservatorë në Gjykatën e Lartë ndikoi ndjeshëm në politikat sociale, përfshirë vendimin për rrëzimin e të drejtave federale për abortin.

Pandemia COVID-19 ishte një nga sprovat më të mëdha të presidencës së tij. Pavarësisht përpjekjeve për të prodhuar vaksina me shpejtësi, qasja e tij ndaj krizës shëndetësore dhe disa komente kontraverse për trajtimin e virusit i shtuan kritikat ndaj tij. Në nëntor të vitit 2020, amerikanët zgjodhën Joe Biden-in si president të ri.

Pas largimit nga detyra, Trump është përballur me një seri padish penale, duke u bërë ish-presidenti i parë amerikan që shpallet fajtor për një krim. Megjithatë, popullariteti i tij mes mbështetësve është më i lartë se kurrë, duke kaluar dy atentate këtë vit dhe duke fituar mbështetje të gjerë për rikthimin e tij të mundshëm.

“Zoti ka një plan për Trump-in. Shpresojmë që ai të bëhet presidenti i 47-të,” thotë mbështetësja Pam Smith nga Pensilvania. Politika amerikane është transformuar në mënyrë të pakthyeshme që nga përfshirja e tij, dhe një rikthim i Trump-it mund të shënojë një kthesë historike për SHBA-të.