Donald Trump ka triumfuar në shtetin e Arizonës, i cili ishte i fundit pa pasur një fitues të shpallur në zgjedhjet presidenciale. Pas numërimit të pak kutive, rezultati është bërë i qartë, duke siguruar 11 votat elektorale të këtij shteti për kandidatin republikan. Kjo fitore për Trump e bën të mundur që të arrijë një total prej 312 delegatëve në kolegjin elektoral, ndërsa Kamala Harris ka siguruar 226 vota.

Sondazhet që parashikonin një rezultat të ndryshe janë hedhur poshtë, pasi të gjithë shtetet e lëkundura kanë kaluar në duar të Trump, përforcuar nga një mbështetje e fuqishme nga elektorati i tij. Megjithatë, shumica në Dhomën e Ulët të Kongresit ende mbetet e papërcaktuar, me republikanët që janë 5 vende larg arritjes së shumicës prej 218 vendesh për të kontrolluar këtë dhomë. Në këtë moment, demokratët kanë të sigurtë 205 vende, ndërsa mbeten për t’u përcaktuar 17 vendet e tjera.

Nëse republikanët arrijnë të fitojnë Dhomën e Ulët, ata do të kenë një pushtet të zgjeruar për të paktën dy vitet e ardhshme, duke mundësuar realizimin e agjendës së tyre, që përfshin luftën kundër migracionit të paligjshëm dhe rigjallërimin ekonomik të vendit.

Në një postim të fundit në rrjetin social Truth, Donald Trump hodhi poshtë spekulimet lidhur me mundësinë që dy figura të administratës së tij të parë, ish-Sekretari i Shtetit Mike Pompeo dhe ish-ambasadorja e SHBA në OKB, Nikki Haley, të bëhen pjesë e kabinetit të tij të ri. Po ashtu, emra të tjerë si senatori i Floridës, Marko Rubio, për postin e Sekretarit të Shtetit, Richard Grenell për këshilltar për sigurinë kombëtare dhe Michael Waltz për sekretar të Mbrojtjes janë përfolur, megjithatë parashikimet e mediave shpesh nuk realizohen nën drejtimin e Donald Trump.