Një epokë e re po nis për Versace, pasi Donatella Versace ka njoftuar largimin e saj nga posti i drejtoreshës kreative të markës ikonike italiane. Ajo do të largohet në fund të muajit mars, duke i dhënë fund një periudhe mbi 30-vjeçare në krye të shtëpisë së modës dhe më shumë se 50 viteve që Versace ka qenë nën drejtimin e familjes.

“Ka qenë nderi më i madh i jetës sime të vazhdoj trashëgiminë e vëllait tim, Gianni… Ai ishte një gjeni i vërtetë, por shpresoj të kem pak nga shpirti dhe këmbëngulja e tij,” – është shprehur Donatella.

Nga prilli, drejtimin kreativ të markës do ta marrë Dario Vitale, 41 vjeç, ish-drejtor i imazhit në Miu Miu. Megjithatë, Donatella do të mbetet e lidhur me Versace si ambasadore kryesore e markës, duke u përfshirë në filantropi dhe evente madhore të modës. “Versace është në ADN-në time dhe gjithmonë në zemrën time,” ka shtuar ajo.

Një histori suksesi dhe sfidash

Donatella, e lindur në vitin 1955 në Reggio Calabria, ishte muzë dhe mbështetëse kryesore e vëllait të saj, Gianni Versace. Ajo u përfshi herët në biznesin familjar dhe mori përgjegjësinë për linjën Versus në vitin 1993.

Pas vrasjes tragjike të Giannit në vitin 1997, Donatella mori drejtimin e markës, edhe pse fillimisht e kishte të vështirë. “Për pesë vitet e para, isha e humbur … kam bërë shumë gabime. I thosha vetes … mos u mundo të jesh Gianni!” – ka treguar ajo në një intervistë të vitit 2017.

Megjithatë, ajo e transformoi Versace-n në një ikonë të modës, duke e kthyer markën në një simbol të luksit, sensualitetit dhe fuqisë. Ajo bashkëpunoi me yje si Madonna, krijoi fustanin e famshëm të Jennifer Lopez që çoi në krijimin e funksionit të kërkimit me imazhe në Google, dhe u bë një zë i fortë në mbështetje të të drejtave LGBTQ+.

Largimi i saj shënon fundin e një epoke, por edhe një fillim të ri për Versace, me një drejtim të ri kreativ që pritet të sjellë një vizion të freskët për markën.