Dorjan Aliaj, njëri prej autorëve të sulmit ndaj avokatit Sokol Mëngjesi, ka dhënë një deklaratë para hetuesve duke treguar me detaje se plani ishte i mirëorganizuar dhe porositur nga Dritan Nano.

Aliaj u vetëdorëzua pasditen e 29 majit, vetëm pak orë pas ngjarjes së rëndë ku ai dhe dy miqtë e tij sulmuan me sende të forta avokatin Mëngjesi në zonën e ish-Bllokut.

Para hetuesve, Aliaj ka pranuar se ishte pjesë e sulmit ndaj avokatit Mëngjesi. Sipas tij, ata kishin planifikuar dhe ndjekur avokatin, duke komunikuar vazhdimisht me agresorët e tjerë për lëvizjet e tij. Ai gjithashtu ka pranuar se dhuna ka ndodhur si pasojë e konfliktit të lindur mes tyre dhe avokatit për pagesat e kontratës për pronën.

Aliaj ka thënë se synonin të bëjnë presion Mëngjesit që të tërhiqet nga gjyqi që kishte hapur për të marrë detyrimet sipas kontratës. Mëngjesi kishte fituar gjyqin kundër Nanos dhe përmbarimi kishte bllokuar pronën e tij, duke mos e lejuar që të vijojë shitja.

Ai ka pretenduar para hetuesve se ai dhe miqtë e tij, duke përfshirë Dritan Nanon, kishin përgatitur dhunën si një mesazh ndaj Mëngjesit. Megjithatë, ata nuk kishin pritur që situata të eskalohej dhe avokati të merrte dëme të rënda.

Nga ana tjetër, Dritan Nano ka mohuar të jetë organizatori i ngjarjes, duke refuzuar të bashkëpunojë me hetuesit, megjithëse ata janë të bindur se ai është organizatori kryesor.