Dorjan Teliti, Koordinator për Programin Ekonomik i Partisë Demokratike dhe zv/kryetar i Këshillit Bashkiak të Tiranës, kritikoi vendimin e kryebashkiakut Erion Veliaj për të dekoruar qytetin me drita festive, duke theksuar se kryeqyteti ka nevojë për transparencë dhe shërbime publike reale, jo vetëm pamje estetike.

Teliti i bëri thirrje Veliajt që të nxjerrë “7 urdhra që ndriçojnë vërtet Tiranën”, duke përfshirë:
1. Transparencë totale – publikimi online i çdo shpenzimi të Bashkisë dhe institucioneve të varësisë.
2. Stop betonizimit – ndalim i ndërtimeve pa kriter që e bëjnë qytetin të pabanueshëm.
3. Publikimi i lejeve të ndërtimit – të gjitha lejet të jenë online me detaje për investitorët dhe sipërfaqet.
4. Stop taksidarëve – ndalim i gjobave dhe kontrolleve arbitrare ndaj bizneseve.
5. Përballë fermerit – hapja e Bashkisë ndaj nevojave të fermerëve dhe zonave rurale.
6. Shërbëtorët e komunitetit – zyrtarët e Bashkisë të veprojnë si shërbëtorë të qytetarëve, jo si “padronë”.
7. Shëndeti dhe ajri i pastër – krijimi i zonave të gjelbra të mbrojtura ligjërisht dhe hapësirave të sigurta për qytetarët.

“Këto janë urdhrat që ka nevojë kryeqyteti. Këto janë urdhrat që NDRICOJNË Tiranën vërtet!” – tha Teliti, duke theksuar se transparenca dhe shërbimet reale janë ajo që i mungon qytetit, jo dritat dekorative.

Ky reagim vjen ndërkohë që Bashkia e Tiranës ka nisur përgatitjet për festat e fundvitit, duke zgjuar debate për prioritetet reale të qytetit.