Dosja e SPAK ka zbardhur lidhjet kriminale të Suel Çelës dhe ndikimin e tij në sistemin e drejtësisë, konkretisht përmes gjyqtares Pajtime Fetah, që ka qenë nën hetim dhe pezullim për akte të dyshuara korrupsioni. Suel Çela, përmes bisedave të zbardhura nga aplikacioni SkyEcc, ka treguar ndikimin e tij të fuqishëm mbi gjyqtarët dhe ka përdorur Pajtime Fetahun për të mbyllur dosje dhe për të mbrojtur aktivitetet kriminale të grupit të tij.

Në bisedat e tij me Fetahun, Çela e quajti atë me epitetet e dashurisë dhe e konsideronte një mbështetje të fuqishme për rikthimin e tij në sistemin e drejtësisë, pas pezullimit të saj nga Këshilli i Lartë i Drejtësisë (KLD) në vitin 2017. Ai ka pretenduar se ndikoi tek ish-Presidenti Ilir Meta, që ishte në krye të KLD-së në atë kohë, për të mundësuar rikthimin e Fetahut në sistem pas skandalit të korrupsionit të publikuar nga emisioni investigativ “Stop”, ku ajo kërkonte ryshfet për lirimin e të burgosurve.

Përveç ndikimit të drejtpërdrejtë të Suel Çelës për t’i hapur rrugë rikthimit të Fetahut në gjyqësor, dokumentet e hetimit sugjerojnë se kjo lidhje kriminale shkon përtej ndikimit politik dhe ka pasur lidhje me aktivitetet mafioze të grupit të Celës, duke përfshirë kërcënime ndaj gazetarëve dhe avokatëve të cilët kishin denoncuar aktivitetet e tij të paligjshme.

Pajtime Fetah, pas rikthimit në detyrë në vitin 2018, është përballur me procedime disiplinore të përsëritura për sjellje dhe veprime që diskreditojnë figurën e gjyqtarit dhe paanshmërinë në gjykim. Në nëntor të vitit 2021, ajo iu nënshtrua një tjetër hetimi nga Inspektori i Lartë i Drejtësisë për shkelje të rëndësishme të etikës profesionale, ndërsa masat disiplinore u përshkruan si të pamjaftueshme për të parandaluar korrupsionin brenda sistemit të drejtësisë.