Publikimi i dokumenteve të reja nga dosja e Jeffrey Epstein nga Departamenti Amerikan i Drejtësisë ka zbuluar komunikime ku përmenden emra të lidhur me Kosovën.

Një email i datës 19 shtator 2012, dërguar nga Konsulli i Kosovës në Tajlandë, identifikuar si “Daniel”, i drejtohet Jeffrey Epstein me titullin “Kush është Behgjet Pacolli?”. Sipas përmbajtjes, dërguesi thekson se “princesha dëshiron që ti ta shohësh këtë video”, duke bashkëngjitur një link që aktualisht nuk funksionon.

Në të njëjtin komunikim përmendet edhe konsullja e atëhershme e Kosovës në Tajlandë, Mom Luang Rajadasari Jayankura, e cila thuhet se kërkoi që materiali t’i përcillej Epstein-it. Ajo shfaqet edhe në një email tjetër të vitit 2012, ku flitet për një takim të mundshëm në New York mes një “princeshe nga Tajlanda” dhe presidentes së Kosovës, atëkohë Atifete Jahjaga.

Mom Luang Rajadasari Jayankura ka folur më parë publikisht për rolin e saj në lobimin për njohjen e Kosovës nga Tajlanda dhe vende të tjera, duke përmendur bashkëpunimin me Behgjet Pacollin dhe përpjekjet për të siguruar mbështetje ndërkombëtare për Kosovën.

Publikimi i këtyre dokumenteve nuk përmban akuza penale ndaj të përmendurve, por hedh dritë mbi komunikimet dhe kontaktet që janë bërë publike në kuadër të dosjes së Epstein.