Kuvendi i Shqipërisë pritet të zhvillojë sot një seancë plenare maratonë, e cila do të nisë në orën 10:00 dhe do të fokusohet në çështje kyçe të drejtësisë dhe reformave institucionale.

Në rendin e ditës parashikohet ngritja e Komisioneve të Posaçme për Reformën Zgjedhore dhe atë Territoriale, për të cilat maxhoranca dhe opozita kanë arritur më në fund dakordësi për përbërjen e barabartë, bashkëkryetarët dhe përfshirjen e ekspertizës ndërkombëtare aty ku do të jetë e nevojshme.

Pas miratimit të komisioneve, seanca do të vijojë me raportimet vjetore të institucioneve të drejtësisë, që pritet të zgjasin disa orë.
I pari që do të dalë para deputetëve është Prokurori i Përgjithshëm, Olsian Çela, i cili do të paraqesë raportin mbi gjendjen e kriminalitetit për vitin 2024.
Më pas, do të raportojë kreu i SPAK, Altin Dumani, për ecurinë e hetimeve dhe sfidat në luftën kundër korrupsionit dhe krimit të organizuar.
Në vijim, Artur Metani do të paraqesë raportin e Inspektorit të Lartë të Drejtësisë (ILD), ndërsa më pas pritet të raportojnë Këshilli i Lartë Gjyqësor (KLGJ) dhe Këshilli i Lartë i Prokurorisë (KLP).

Në seancë nuk do të jetë i pranishëm deputeti Gazment Bardhi, i cili është përjashtuar për dy javë pas përplasjes me kryetarin e Kuvendit, Niko Peleshi, në seancën e kaluar.

Në një shkresë zyrtare drejtuar Peleshit, Bardhi ka kërkuar që të shmangen provokimet ndaj deputetëve të opozitës, duke paralajmëruar se çdo veprim që cenon të drejtat e opozitës do të konsiderohet “atentat ndaj parlamentarizmit”.

“Çdo ndryshim i njëanshëm nga Kuvendi i të drejtave të deputetëve të pakicës, apo i interpretimit 34-vjeçar të Rregullores së Kuvendit, është atentat ndaj parlamentarizmit dhe asgjësim i të drejtave të opozitës parlamentare,” – thuhet në letrën e firmosur nga grupi i PD-së.

Seanca e sotme pritet të shënojë një nga ditët më intensive të këtij sesioni parlamentar, me çështje që prekin drejtpërdrejt reformat kryesore dhe funksionimin institucional të vendit.