Prokuroria e Tiranës ka marrë të pandehur Drejtorin e IT-së në Policinë e Shtetit, Ervin Muça, i cili akuzohet për “Hyrje të paautorizuar kompjuterike”. Sipas organit të akuzës, Muça ka kopjuar bazën e të dhënave TIMS, e cila regjistron hyrje-daljet e qytetarëve jashtë vendit.

Për këtë çështje, Prokuroria ka vendosur veçimin e hetimeve, duke shqyrtuar gjithashtu edhe mundësinë e ngritjes së akuzave për shpërdorim detyre.

Komisioni Hetimor: Muça nuk përmbushte kushtet për këtë post

Ky rast ishte gjithashtu objekt hetimi nga Komisioni Hetimor Parlamentar, i drejtuar nga deputeti Ervin Salianji. Në përfundim të punimeve të komisionit, Salianji deklaroi në Kuvend se Muça nuk i plotësonte kushtet për të qenë Drejtor i IT-së në Policinë e Shtetit.

Ai renditi disa problematika lidhur me figurën e Muçës, duke përfshirë:

• Procedim penal në Itali për falsifikim dokumentesh në vitin 2007,

• Refuzim të lejes së qëndrimit në Itali në vitin 2008,

• Mosplotësim të formularit të dekriminalizimit,

• Mungesë të trajnimeve të detyrueshme për postin,

• Mungesë të certifikatës së sigurimit të personelit,

• Dy punësim në Agjencinë e Kadastrës,

• Emërim i parakohshëm, 10 ditë para hapjes së vendit vakant dhe 8 ditë para lëshimit të urdhrit të emërimit.

Çfarë pritet të ndodhë?

Tashmë që Prokuroria e Tiranës ka nisur procedimin penal ndaj Muçës, pritet që hetimet të thellohen për të zbuluar nëse ka patur ndihmës apo qëllime të tjera pas hyrjes së paautorizuar në sistemin TIMS.

Ky rast pritet të ketë ndikim të madh në strukturat e Policisë së Shtetit, duke ngritur shqetësime mbi sigurinë e të dhënave dhe procesin e emërimeve në pozicione kyçe.