Një 30-vjeçar është arrestuar në Durrës pasi në automjetin e tij u gjetën 116,685 euro, të cilat dyshohet nga policia se janë përfituar në mënyrë të kundërligjshme.

Denis Trebeshina u arrestua në kuadër të operacionit ‘Sundimi i ligjit’ që po zhvillohet në të gjithë vendin.

Hetuesit e krimeve ekonomike-financiare kishin informacione për një shtetas që posedonte një shumë të madhe parash.

Ata e ndaluan të riun në lagjen nr.17 në Durrës dhe gjatë kontrollit iu gjetën paratë, të cilat u sekuestruan.

Vijon puna hetimore për të verifikuar burimin e të ardhurave të këtyre parave, ndërsa materialet proceduriale janë dërguar te Prokuroria.