Një ngjarje e rëndë është regjistruar në Durrës, ku Policia ka arrestuar në flagrancë një 33-vjeçar, i cili akuzohet se mbante me forcë në banesën e tij një 15-vjeçare, duke ushtruar ndaj saj dhunë psikologjike dhe duke mos e lejuar të largohej.
Operacioni u zhvillua pas njoftimit të marrë nga familjarët e të miturës, të cilët kishin raportuar se vajza nuk po kthehej në shtëpi. Shërbimet e Komisariatit të Policisë Durrës, në bashkëpunim me forcat operacionale të Drejtorisë Vendore të Policisë Durrës, ndërhynë menjëherë dhe arrestuan shtetasin:
Enea Zeqiri, 33 vjeç, banues në lagjen nr. 14, Durrës.
Gjatë kontrollit të banesës, efektivët i gjetën të arrestuarit një pistoletë tip “Zastava” me silenciator dhe municion luftarak, të cilat u sekuestruan si prova materiale.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprat penale:
• “Dhuna në familje”
• “Heqja e paligjshme e lirisë”
• “Mbajtja pa leje e armëve dhe municioneve”
Burime nga hetimi paraprak bëjnë me dije se 33-vjeçari dyshohet se kishte një marrëdhënie intime me të miturën, çka do të jetë gjithashtu objekt hetimi nga organet kompetente. Vajza tashmë është marrë nën kujdesin e autoriteteve dhe ndodhet pranë familjes, ndërsa po i ofrohet ndihmë psikologjike.
