Një shtetas 53-vjeçar është arrestuar në Durrës pas dyshimeve se ishte i përfshirë në përpunimin dhe ndarjen e lëndës narkotike për qëllime shitjeje. Ky arrestim është pjesë e operacionit të koduar “Tempulli 2”, një megaoperacion policor për goditjen e veprimtarive kriminale në fushën e narkotikëve.
Sipas raportimeve, shtetasi u kap në flagrancë në banesën e tij në fshatin Xhafzotaj në Durrës, ku policia zbuloi një sasi të dyshuar të lëndës narkotike cannabis sativa, si dhe një grirëse dhe dy kallëpe metalike, të dyshuara se përdoren për përpunimin dhe ndarjen e drogës në doza për shitje.
Shtetasi u arrestua për veprën penale “Prodhimi dhe shitja e narkotikëve”, dhe materialet procedurale janë transferuar në Prokurorinë pranë Gjykatës së Shkallës së Parë të Juridiksionit të Përgjithshëm në Durrës për hetime të mëtejshme.
Dyshohet se shtetasi siguronte dhe përpunonte drogën në banesën e tij, duke e ndarë në doza për shitje, veprim ky që kryhej kryesisht në afërsi të shkollave dhe lagjeve të qytetit të Durrësit.
