Një ngjarje e rëndë ka tronditur qytetin e Durrësit në orët e para të mëngjesit, ku një 44-vjeçar ka humbur jetën pasi ra në kontakt me energjinë elektrike. Viktima është identifikuar si Fatbardh Kaloshi, baba i tre fëmijëve.

Sipas informacioneve paraprake, Kaloshi ka rënë në kontakt me ujin e grumbulluar në rrugë dhe një shtyllë elektrike të dëmtuar, duke ndërruar jetë menjëherë në vendngjarje.

Raportohet se shtylla e ndriçimit rrugor ishte e dëmtuar prej disa ditësh dhe rreziku ishte paraprakisht raportuar tek autoritetet përkatëse, por pa asnjë ndërhyrje për ta riparuar.

Policia e Durrësit njofton se rreth orës 07:15, në lagjen nr. 6, 44-vjeçari ka rënë në kontakt me rrymën elektrike. Grupi hetimor ndodhet në vendngjarje dhe po punon për sqarimin e plotë të rrethanave të tragjedisë.

Ngjarja ka tronditur komunitetin lokal dhe risjell shqetësime për sigurinë e infrastrukturës elektrike në qytet, sidomos në kohë reshjesh.