Juventusi do të duhet të përballet pa Dusan Vlahovic në ndeshjen e fundjavës kundër Monzës, pasi sulmuesi serb ka pësuar një mbingarkesë muskulore në rectus femoris të kofshës së djathtë.

Në një njoftim zyrtar, klubi bardhezi bëri me dije se dëmtimi është pasojë e ndeshjes së fundit ndaj Parmës dhe pas kontrolleve mjekësore të kryera në J Medical, është vlerësuar se rikuperimi i lojtarit do të zgjasë 7 deri në 10 ditë.

Kjo do të thotë se Vlahovic nuk do të jetë i gatshëm për sfidën në “Allianz Stadium” ndaj Monzës këtë të diel. Stafi mjekësor i Juventusit do të përqendrohet në përgatitjen e tij për të qenë gati për ndeshjen vendimtare më 4 maj ndaj Bolognës në “Dall’Ara” – një përballje kyçe në garën për kualifikimin në Champions League.