Policia e Lezhës ka arrestuar këtë të shtunë dy persona, njëri për mbajtje të lëndëve narkotike dhe tjetri për dhunë ndaj vajzës së tij të mitur.

Syrgen Shala, 24 vjeç, banues në Mamurras, u arrestua nga specialistët e Sektorit të Qarkullimit Rrugor dhe Forcat e Posaçme “Shqiponja”. Gjatë kontrollit të automjetit të tij tip Toyota, policia gjeti dhe sekuestruan një sasi lënde narkotike të dyshuar si Cannabis Sativa, një aparat celular dhe një grirëse metalike. Po ashtu, automjeti i përdorur nga Shala u sekuestrua.

Në një rast tjetër, Mikel Ahmeti, 37 vjeç, u arrestua nga specialistët e Hetimit të Krimeve të Komisariatit të Policisë Mirditë, pas një denoncimi se kishte ushtruar dhunë ndaj vajzës së tij të mitur, duke e goditur me një send të fortë në kokë. Fatmirësisht, vajza e tij nuk është në rrezik për jetën.

Materialet procedurale për të dyja çështjet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme.