Dy autobusë me tifozë të sport klubit Skënderbeu u sulmuan me sende të forta pas përfundimit të ndeshjes me Partizanin, e cila u luajt mbrëmjen e 17 majit në stadiumin “Air Albania”.

Partizani fitoi 1-0 kundër Skënderbeut në gjysmëfinalen e “Final 4” dhe është finalisti i parë për ndeshjen e 26 majit. Pas ndeshjes, tifozët e Skënderbeut u drejtuan për në qytetin e Korçës, por u sulmuan në hyrje të qytetit të Elbasanit, në zonën e njohur si rrethrrotullimi i luleve.

Tifozët kërkuan ndihmën e policisë së Elbasanit, e cila kreu veprimet hetimore. Nga pamjet e mbërritura në redaksi, autobusët kishin xhama të thyer dhe shenja të goditjeve me gurë. Fatmirësisht, nuk pati të lënduar nga ky incident.

Pasi u kryen veprimet hetimore, autobusët me tifozë u larguan dhe vijuan rrugën drejt qytetit të Korçës.