Dy persona janë arrestuar nga Njësia për Hetimin e Krimeve Ekonomike dhe Korrupsion në rajonin e Ferizajt. H.S dhe E.S, si pronar/e dhe përgjegjës në një auto-shkollë me seli në Kaçanik dhe degën e saj në Han të Elezit, dyshohen për veprat penale “Pranimi i Ryshfetit në Sektorin Privat’’ dhe “Falsifikimi i Dokumenteve’’.
Sipas njoftimit të policisë, dy të dyshuarit akuzohen se, me qëllim përfitimi, kishin pranuar ryshfet nga kandidatë të ndryshëm për t’ua mundësuar marrjen e patentë-shoferëve të kategorisë B dhe C pa iu nënshtruar testeve dhe kritereve përkatëse. Ata kanë siguruar gjithashtu certifikatat mjekësore pa i nënshtruar kandidatët kontrolleve të rregullta mjekësore dhe kanë falsifikuar dokumentet që dëshmonin se kandidatët ishin aftësuar në pjesën teorike dhe praktike të provimit.
Në lidhje me këtë rast, janë konfiskuar si prova materiale dy telefona mobilë, pesë libra-regjistratorë, shtatë fletore regjistrimi, një fletore interne dhe xhepi, 64 dosje origjinale të kandidatëve dhe 21 certifikata mjekësore të shoferëve profesionalë.
Pas bastisjes, dy të dyshuarit janë shoqëruar dhe intervistuar në prezencë të avokatit mbrojtës, i caktuar sipas detyrës zyrtare. Të gjitha veprimet hetimore janë kryer në koordinim me Prokurorin përgjegjës të rastit. Pas intervistës, me Aktvendim të Prokurorit, të dyshuarit janë ndaluar për 48 orë për procedurë të mëtejshme ligjore. Rasti mbetet nën hetime.
