Policia e Shkodrës ka shpallur në kërkim dy persona të dyshuar për përfshirje në masakrën e Dobraçit, ku u ekzekutuan me armë zjarri Hamza Lici dhe Arlind Bushati, ndërsa Flutura Basha humbi jetën pasi mjeti ku udhëtonte së bashku me bashkëshortin u përplas nga një automjet S Class i drejtuar nga viktimat.

Sipas burimeve, dy të kërkuarit janë Izmir Sakica dhe Samuel Troshani, të dy të njohur si anëtarë të grupit të Bajrave, një familje që ka pasur përplasje të gjata dhe të dhunshme me familjen Lici, duke shkaktuar viktima në të dyja palët.

Gjithashtu, Sakica dhe Troshani janë në kërkim për një incident tjetër të ndodhur më 23 gusht në Bushat të Shkodrës, ku dyshohet se ka pasur një shkëmbim zjarri mes tyre dhe vëllezërve Andrea e Sandër Prendi. Aktualisht, në Shkodër ndodhet forca speciale RENEA, e cila po kreh zonën për të kapur të kërkuarit, ndërsa policia është duke shqyrtuar kamerat e sigurisë, jo vetëm në zonën e ngjarjes, por edhe në lagje të tjera të qytetit.

Ndërkohë, ende nuk është konfirmuar nëse personi i tretë në mjetin e viktimave ishte Ibrahim Lici. Pavarësisht pranisë së një fotoje që ngjan me të shumëkërkuarin, policia ende nuk ka konfirmuar identitetin e tij. Pritet analizimi i njollave të gjakut dhe shenjave të gishtave për të përcaktuar nëse është ai apo jo.