Një ngjarje e rëndë ka ndodhur në Maliq mbrëmjen e djeshme, ku dy persona janë përfshirë në një konflikt për motive të dobëta dhe 30-vjeçari ka nxjerrë armën duke tentuar të vrasë personin tjetër me të cilin nisi sherrin.

Mësohet se personi që u tentua të vritej ka qenë i dënuar më parë për armëmbajtje pa leje. Për fat të mirë, nga ngjarja nuk ka të lënduar, pasi 29-vjecari i ka shpetuar plumbave te automatikut per mrekulli.

Sipas policisë, mbrëmjen e djeshme rreth orës 22:30, “pas marrjes së njoftimit se në fshatin Pendavinj, Maliq, shtetasi J. Q., 30 vjeç, gjatë një konflikti për motive të dobëta, me shtetasin B. D., 29 vjeç (i dënuar më parë për armëmbajtje pa leje), të dy banues në fshatin Pendavinj, kishte qëlluar me armë zjarri tip automatik në drejtim të tij, pa i shkaktuar lëndime, shërbimet e Komisariatit të Policisë Maliq, në bashkëpunim me Strukturat për Hetimin e Krimeve në Dvp Korçë dhe Forcat Speciale “Shqiponjat”, shkuan menjëherë në vendngjarje dhebënë të mundur parandalimin e përshkallëzimit të mëtejshëm të konfliktit, kapjen dhe ndalimin e autorit të dyshuar të ngjarjes”.

Nga kontrolli i ushtruar në banesën e shtetasit J. Q., u gjetën e sekuestruan në cilësinë e provës materiale krëhëra automatiku dhe pushke, pjesë të tjera përbërëse të armëve të zjarrit dhe municion luftarak.

Materialet në ngarkim të tij i kaluan Prokurorisë pranë Gjykatës së Shkallës së Parë Korçë për veprat penale “Vrasja me dashje”, e mbetur në tentativë dhe “Armëmbajtja pa leje”.