Një grabitje me armë mbrëmjen e djeshme në një dyqan në Mitrovicë ka përfunduar me vrasje. Dy persona të armatosur kanë qëlluar drejt pronarit të dyqanit, duke e lënë të plagosur fillimisht.

Pavarësisht se ai u dërgua në spital, nuk arriti t’i mbijetonte plagëve të marra. Ngjarja ka ndodhur në rrugën “Mbretëresha Teutë” në Mitrovicë të Kosovës.

Sipas mediave kosovare, autorët hyjnë dhe kërcënuan me armë pronarin e dyqanit. Pronari bëri rezistencë dhe dy autorët e qëlluan.

Menjëherë pas ngjarjes, policia shkoi në vendngjarje dhe ka bërë të mundur arrestimin e dy personave të dyshuar.

“Nga hetimet fillestare bëhet e ditur se dy persona të dyshuar e të maskuar nën kërcënimin e armës kanë tentuar të grabitin viktimën i cili ndodhej në dyqanin e tij, si pasojë e të shtënave nga të dyshuarit në drejtim të viktimes, viktima ka mbetur i plagosur. Lidhur me rastin janë ndërmarrë veprime të shpejta policore, janë identifikuar dhe arrestuar dy persona të dyshuar si dhe është sekuestruar një armë”, thuhet në njoftimin e policisë.